भोजपुर । भोजपुरमा तेस्रो बिहानी कप अण्डर–१६ अन्तर विद्यालय स्तरीय पुरुष फुटबल प्रतियोगिता यहि भाद्र १७ गतेदेखि शुरु हुने भएको छ । शनिवार भोजपुर जिल्ला फुटबल संघले पत्रकार सम्मेलन गरी प्रतियोगितामा १५ विद्यालयको सहभागिता रहने जानकारी दिएको हो। बिहानी फुटबल क्लव भोजपुरको आयोजना तथा जिल्ला फुटबल संघको संयोजनमा विद्यालय स्तरीय प्रतियोगिता सञ्चालन हुने अध्यक्ष बिकल श्रेष्ठले जानकारी दिए ।
प्रतियोगितामा भोजपुर नगरपालिका, षडानन्द नगरपालिका, टेम्कैमैयुङ गाउँपालिका र पौवादुङमा गाउँपालिकाभित्रका विद्यालयले भाग लिनेछन्। तालिका अनुसार समुह क तर्फ सात र समुह ख तर्फ आठ बिद्यालयको सहभागिता हुने जिल्ला फुटवल संघका प्रशिक्षक बिनम श्रेष्ठले पत्रकार सम्मेलनमा जानकारी दिए । भाद्र १७ गते हुने उद्घाटन खेल तीन वटा हुनेछन् ।
जसमा पहिलो भोजपुर एकेडेमी भोजपुर र सगरमाथा बोडिङ स्कुल भोजपुर, दोश्रो कालिका मावि हेलौछा र पञ्चकन्या मावि बोखिम तथा तेश्रो खेल अरुण मावि दिङला र सिद्धेश्वर मावि दाँवाका बीचमा हुने छ । प्रतियोगितामा प्रथम र दोश्रो हुने टिमले क्रमशः नगद ४४ हजार चार सय ४५ र २२ हजार दुई सय २३ रूपैयाँको साथमा ट्रफी, मेडल र प्रमाण पत्र पाउने छन ।










