भोजपुर । नेपाल कम्युनिष्ट पार्टी (माओवादी केन्द्र) भोजपुरले जिल्ला एकता घोषणा कार्यक्रम आगामी मंसिर २६ गते गर्ने भएको छ । नेपाल कम्युनिष्ट पार्टी (माओवादी केन्द्र) जिल्ला समन्वय समिति संयोजक नगेन्द्र भुजेलले बैठकले गरेका निर्णयहरु आइतवार बिहान पत्रकार सम्मेलन मार्फत सार्वजनिक गरे ।
बैठकले सुरुवातमा शहीदहरूप्रति श्रद्धाञ्जली अर्पण गर्दे पार्टी एकता, संगठन सुदृढीकरण र राजनीतिक स्थायित्वका विषयमा गहन छलफल भएको संयोजक भुजेलले जानकारी दिए । जेन्जी आन्दोलनले उठाएका एजेण्डा र परिवर्तनलाई स्वीकार गर्दे मुलुकको सम्प्रभुता, सार्वभौमिकता, सुशासन, सामाजिक न्याय, समाजबाद र वर्तमान संविधान, व्यवस्थालाई रक्षा गर्दै राजनैतिक स्थायित्वका लागि कम्युनिस्ट पार्टीहरु, देशभक्तहरु, समाजवादीहरुको बीचमा बनेको नेपाली कम्युनिस्ट पार्टीमा एकताबद्ध भएर एकीकरणमा जाने सर्वसम्मत निर्णय लिएको छ ।
जिल्लाको रामप्रसादराई गाउँपालिका र अखिल क्रान्तिकारीमा एकताको प्रक्रियामा जान असहमत रहेको सामाजिक सञ्जालको हल्ला जस्तो बिल्कुल नभएको, पार्टीबाट बहिरगमन भएर रिक्त रहेको सबै कमिटीको पदहरुमा पदपूर्ति गरि कमिटीलाई पूर्णता दिने र पार्टी एकता, संगठन सुदृढीकरण र राजनीतिक स्थिरताका लागि सबै तहमा सक्रियरूपमा भूमिका निर्वाह गर्न नेता कार्यकर्तालाई आग्रह गर्ने जस्ता निर्णयहरु भएको संयोजक भुजेलले बताए ।
दुई दिनसम्म चलेको बैठकमा पूर्वमाओवादी केन्द्रका पुर्व स्थायी समिति सदस्य तथा विशेष महाधिवेशन आयोजक समितिका सदस्य अजम्बर काङमाङ, केन्द्रीय सदस्यहरु नगेन्द्र राई, कुमार योञ्जन, प्रदेश सचिवालय सदस्यहरु बिमल खड्का, शरण तामाङ, बबिन्द्र रसाईली, दिलकुमार राई, राजेश खतिवडा, प्रदेश सदस्यहरु दलबहादुर गिरी, अशोक राई, तिर्थ पराजुली, राजेन्द्र रुम्बा, हर्कराज राई पालिका अध्यक्षहरु, जनवर्गीय संगठनका प्रतिनिधिहरु र मोर्चाका प्रतिनिधिहरुको सहभागिता रहेको थियो ।
बैठकले अन्त्यमा नेपाली कम्युनिष्ट पार्टीको केन्द्रीय समितिको निर्देशनात्मक सर्कुलर अनुसार आगामी १५ गते प्रदेश पार्टी एकता घोषणा, २६ गते भोजपुर जिल्लामा एकता घोषणासभा र २९ गते भोजपुर जिल्लाका प्रत्येक पालिकामा पार्टी एकता घोषणासभा गर्ने निर्णय पनि गरेको छ ।
