भोजपुर । नेपाली कांग्रेस जिल्ला कार्य समिति भोजपुरले पार्टीभित्र चलिरहेको महाधिवेशन ढिल्याउने प्रयासलाई कडा रूपमा अस्वीकार गर्दै आगामी निर्वाचनअघि नै महाधिवेशन सम्पन्न गर्नुपर्ने निर्णय गरेको छ। समितिको बैठकले– “पार्टीलाई विधि प्रक्रिया अनुसार अघि बढाउन महाधिवेशन अब अनिवार्य छ” भन्ने निष्कर्ष निकालेको हो।
बैठकमा जिल्लाका पदाधिकारी र नेताहरूले लामो समयदेखि लेवी नतिर्ने र जिम्मेवारीबाट पन्छिने प्रवृत्ति देखिएको भन्दै यस्ता व्यक्तिको क्रियाशील सदस्यता नवीकरण नगर्ने कठोर निर्णय गरेका छन्। सभापति विनोद बान्तावाका अनुसार, क्रियाशील सदस्यता नवीकरण अन्तिम चरणमा पुगेको छ र नयाँ सदस्यका फारमहरू वडा–वडामा वितरण भइसकेका छन्।
बैठकले पार्टीभित्र अहिले वृहत् एकता र संगठन सुदृढीकरण अत्यावश्यक रहेको उल्लेख गर्दै, संघीयता, लोकतन्त्र र गणतन्त्रात्मक संविधानलाई पूर्ण रूपमा कार्यान्वयन गरेर जनतामा परिवर्तन ल्याउनुपर्नेमा जोड दिएको छ।
यससँगै, जेनेरेशन–जी को मागलाई सम्बोधन गर्दै युवाको आवाज लिएर निर्वाचनमा जानु पर्ने निष्कर्ष पनि बैठकले निकालेको छ।
कांग्रेस भोजपुरले हालै पार्टी केन्द्रीय कार्यालयमा गरिएको आगजनी र कांग्रेस सभापतिमाथि भएको हातपातप्रति घोर निन्दा प्रकट गरेको छ। साथै, घटनासम्बन्धी छानबिन गर्न बनेको आयोगले निष्पक्ष छानबिन गर्नुपर्ने र आवश्यकताअनुसार पार्टी त्यसमा सहकार्य गर्न तयार रहेको स्पष्ट पारेको छ।
जिल्ला कार्य समिति भोजपुरले आयोजना गरेबको वैठकमा कांग्रेस केन्द्रिय सदस्य उमेशजंग रायमाझी, महासमिति सदस्य तथा महादिवेशन प्रतिनीधि, प्रदेश सदस्य जिल्ला, क्षेत्रका पधादीकारीहरुसंगै क्रियाशिल सदस्यहरुको उपस्थिती रहेको थियो ।
